TATITRY NY FILANKEVITRY NY MINISITRA NATAO TAO AMIN’NY LAPAM-PANJAKANA IAVOLOHA
ALAROBIA 02 JONA 2021
NOTANTERAHINA TAO AMIN’NY LAPAM-PANJAKANA IAVOLOHA NY FILANKEVITRY NY MINISITRA ANDROANY IZAY NOTARIHIN’NY FILOHAM- PIRENENA ANDRY NIRINA RAJOELINA ARY NAHITANA NY PRAIMINISITRA SY IREO MINISITRA ISAN-TOKONY :
-
I- FAMPAHAFANTARANA
TATITRY NY FANDRAISANA ANJARA TAMIN’NY FIVORIAN’NY FILANKEVITRY NY MINISITRA ANDIANY FAHA 35 TEO ANIVON’NY « COI » TAMIN’NY 20 MAY 2021.
Notontosaina tamin’ny 20 May 2021 ny Filankevitry ny Minisitra teo anivon’ny COI izay nahafahana nanara-maso ny fampiharana ny fanapahan-kevitra noraisin'ny tompon'andraikitra teo aloha, nahitana ny fandraisan’anjaran’ireo firenena 5 mpikambana ao amin'ny Vaomiera : ny Sekretera jeneraly, ireo mpanara-maso ary ireo mpiara-miombon’antoka ara-teknika sy ara-bola
Ireto avy ireo fanapahan-kevitra lehibe notapahina tamin’izany :
1-Ny mikasika ny fiarovana an-dranomasina : manasongadina ny fiantraikany tsara amin'ny hetsika fanoherana ny tsy fandriampahalemana an- dranomasina. Amin'ny maha firenena tompon'andraikitry ny « Regional Maritime Information Fusion Center » azy, dia asaina hanendry ny Tale jeneralin'ny ivon-toerana i Madagasikara.
2- Ny fandraisana ny drafitra « Economie bleue »ho an'ireo faritra COI ka miompana amin’ny paikady mikasika ny « Enonomie circulaire », ny fahaiza- mitantana ary ny fiarovana ny tontolo iainana maharitra sy ny ara-tsosialy.
3-Mikasika ny laharam-pahamehan'ny fitantanana frantsay mandritran’ny herintaona eo anivon’ny COI: Fanamafisana orina ny rafitry ny COI, fiaraha-miasa amin'ny lafiny maro, indrindra fandriampahalemana ary fanaovana ny Frankôfônia ho fototry ny fiaraha-miasa amin'ny COI.
TETIKASA FANOHANANA NY SEHATRY NY INDOSTRIA SY NY SEHATRA ARA-BOLA MIARAKA AMIN’NY BAD (Projet d’Appui à l’Industrialisation et au Secteur Financier)
Nankatoavina ny firosoana amin’ny tetikasa fanohanana ny sehatry ny indostria sy ny sehatra ara-bola izay :
- Manome sehatra ny fampiasam-bola ho an'ny toekarena mirindra sy maharitra tanterahin'ny sehatra tsy miankina;
- Manamora ny famoronana tahirim-bola maharitra ho an'ny fiaraha- miombon'antoka miankina sy tsy miankina (PPP);
- Manamora ny fananganana ny « Fonds National de développement Industriel » (FNDI) hanomezana fanampiana ara-bola ny PME
MADAGASIKARA SY NY VONDRONA ERAOPEANINA HIFAMPIDINIKA NY 27 SY 28 VOLANA MAY 2021 MIKASIKA NY FIFANARAHANA MOMBA NY FANJONONA « ACCORD DE PECHE »
Hotanterahina ny fifampidinihina momba ny fanjonona eo amin’ny Fanjakana Malagasy izay soloin-tenan’ny Ministeran’ny Raharaham- bahiny, Ministeran’ny Fambolena, ny Fiompiana ary ny Jono ary ny APMF amin’ny Vondrona Eraopeanina mba :
- hametrahana ny fiandrianam-pirenena amin’ny fari-dranomasina Malagasy azo anjonona ;
- hampiroboroboana ny lalam-piharian’ny jono ;
- hanitsiana ny haba tokony haloan’ireo sambo eraopeanina araka ny tahan’ ny haba vaovao nofaritana tamin’ny Filankevitry ny Minisitra tamin’ny 2 may 2021 ;
- hamerana ny isan’ireo sambo afaka miasa amin’ny fari-dranomasina Malagasy ;
TETIKASA NOHATSARAINA AO AMIN’NY MINISTERAN’NY FANAJARIANA NY TANY SY NY ASA VAVENTY.
Nankatoavina ireo tetik’asa tafiditra ao anatin’ny fandaharan’asa vaovao voafaritra ao anatin’ny tetibola 2021, izay tanterahan’ny Ministeran’ny fanajariana ny tany sy ny asa vaventy amin’ity taona ity.
FANOMEZAN-DALANA HANANGANANA NY "HOPITALY MANARA-PENITRA" VAOVAO AO IHOSY
Ny fananganana « hopitaly manara-penitra » dia voalahatra ao anatin’ny tetikasa vaovao momban’ny fivoaran'ny minisiteran'ny fahasalamam-bahoaka. Tafiditra ao anatin’izany fanorenana izany ny trano sy ireo fitaovana teknika
FAMPIHARANA NY TETIKASA « TITRE VERT » AO AGNARAFALY - DISTRIKAN'AMBOASARY
Mba hanatsarana ny fari-piainan'ny ankohonana 1600 tokantrano tratry ny KERE dia nanapa-kevitra ny Filohan'ny Repoblika fa hanokana velaran-tany 200ha any Agnarafaly ao amin'ny Distrikan'Amboasary hanaovana asa fambolena. Io tetik’asa io dia tohanan'ny Ministeran’ny Fambolena sy Fiompiana ary ny Jono amin'ny alàlan'ny laminasa mitarika fidiram-bola ho an’ireo tokantrano voakasik’izany.
Ireto ny dingana arahina amin’izany :
- Ny andiany voalohany dia ny fanajariana ny tany ahafahana mametraka tokantrano miisa 80 eo amin’ny velaran-tany mirefy 12 ha
- Ny andiany faharoa dia fanitarana ny asa ahafahana manampy tokantrano mihoatran’ny 1600 eo amin’ny velaran-tany mirefy 200 ha
FAHAZOAN-DALANA AVY AMIN’NY MINISITRY NY FAMBOLENA, FIOMPIANA ARY NY JONO MIKASIKA NY FANAFARANA SY NY FITSINJARANA AMBONGADINY NY FANAFODY SY NY VOKATRA BIOLOJIKA FAMPIASA AMIN’NY BIBY FIOMPY
Nankatoavin’ny Filankevitry ny Ministra ny fanomezan-dalana ho an’ny fanafarana sy ny fitsinjarana ambongadiny ny vokatra ara-pitsaboana sy ny vokatra biolojika fampiasa amin’ny biby fiompy izay fehezin'ny Toko faha-IV amin'ny didim-panjakana laharana 92284 tamin'ny 26 febroary 1992, izay taterahan’ny orinasa VOKATRA TSARA izay efa nahazo fankatoavana tamin’ny tompon’andraikitra misahana ny biby fiompy.
FAMANDRIHANA IREO FARITRA HANAOVANA FANDINIHANA ARA- JEOLOJIKA AO AMIN'NY KAOMINA AMBANIVOHITRA KELILOHA SY ANDRIAMENA, DISTRIKAN'I TSARATANANA, FARITRA BETSIBOKA
Hanao fandinihana ara-jeolojika amin'ireo faritra izay heverina fa manana harena ankibon’ny tany any Keliloha sy Andriamena, ao amin'ny Distrikan'i Tsaratanana, Faritra Betsiboka mandritry ny enim- bolana ny fanjakana, noho izany natao ny fangatahana famandrihan-toerana hanaovana izany fanadihadiana izany any amin'ireo toerana voafaritra ireo.
Noho izany dia tsisy ary tsy afaka atao ny fanomezana alalana hitrandrahana harena an-kibon'ny tany ireo faritra ireo mandritry ny enim-bolana
TETIKASA VAOVAO AO ANATIN’NY PNE 2021 AVY AMIN'NY MINISTERAN'NY SERASERA SY NY KOLONTSAINA.
- Nankatoavina ny fananganana Trano fihaonan’ny mpanao gazety na ny « maison de la presse » izay toeram-pivoriana sy ivon-toerana fihofanana ho azy ireo
- Nankatoavina ny fananganana ivon-toerana « Tosik’art » ao Maevatanana, Antsirabe, Tsiroanomandidy, Mananjary, Miarinarivo, Ihosy, Sambava mba hamporisihana sy hampiroboroboana ny fandraharahana ara-kolontsaina
- Nankatoavina ny fanarenana ny trano Mahitsielafanjaka, ny lapa Manampisoa ary ny lapa Tranovola ao amin'ny Rovan'i Madagasikara
NANKATOAVINA NY DRAFITRA IADIANA AMIN'NY FANONDRANANA AN- TSOKOSOKO EO ANIVON’NY SERANAM-PIARAMANIDINA IRAISAM- PIRENENA ETO MADAGASIKARA.
Nankatoavin’ny Filankevitry ny Minisitra ny drafitr’asa sy drafim-pandaminana iadiana amin’ny fanondranana an-tsokosoko eo anivon’ireo seranam- piaramanidina rehetra iraisam-pirenena eto Madagasikara .
-
II - FANDANIANA DIDIM-PANJAKANA SY VOLAVOLAN-DALANA :
Araka ny tolo-kevitry ny Sekreteram-panjakana misahana ny zandarimariam-pirenena :Nolaniana nandritran’ny Filankevitry ny Minisitra ny didim-panjakana momba ny sata mifehy ny « Direction générale de la sécurité routière » (DGSR).
-
III- FANENDRENA
Nankatoavin’ny filankevitry ny minisitra ny didim-panjakana manendry ireto olom-panjakana ambony manaraka ireto:
Araky ny tolo-kevitry ny Filohan’ny Repoblika :
- Ramatoa Soatiana RAJOELISOA dia voatendry ho Talen’ny serasera sy ny fifandraisana eo anivon’ny Fiadidiana ny Repoblika
Araka ny tolo-kevitry ny Minisitry ny Fanabeazam-pirenena :
- Ramatoa RANOSY Eliane dia voatendry ho talen’ ny Birao Nasionaly misoroka ny loza any an-tsekoly (Office National de la Prévention des Accidents Scolaires) eo anivon’ny Minisiteran’ ny Fanabeazam-pirenena.
Araka ny tolo-kevitry ny Ministry ny Indostria, Varotra ary ny Asa-Tanana
- Atoa RANDRIAMIARAMAHEFA Andriniaina dia voatendry ho talem- paritra ao Vakinankaratra
-
IV- FANAFOANANA
Nankatoavin’ny Filankevitry ny Minisitra ny didim-panjakana manafoana ny fanendrena ireto olom-panjakana ambony manaraka ireto :
Araka ny tolo-kevitry ny Filohan’ny Repoblika :
- Foana ny didim-panjakana laharana faha 2019-142 tamin’ny 20 febroary 2019 izay nanendry ny Talen’ny serasera sy ny fifandraisana eo anivon’ny Fiadidiana ny Repoblika.
Natao androany faha 02 Jona 2021
Ny sampan-draharahan’ny serasera sy ny fifandraisana
eo anivon’ny Fiadidiana ny Repoblika
